Roxas City, Capiz – Nasapwan nga yara na sa state of decomposition ang bangkay sang isa ka engineer sa ikatatlo nga panalgan sang gina-construct nga building sang Philippine Coast Guard (PCG) sa Barangay Culasi, Roxas City kagab-i.
Ginkilala ang biktima nga si Engr. Roger Banico, residente sang President Roxas, Capiz nga nagatrabaho bilang engineer sa nasambit nga building. Base sa impormasyon nagikan sa PCG-Roxas, nga tatlo na ka adlaw nga wala makit-an ang presensiya sang biktima. Wala man ini makapauli sa ila nga balay rasun nga ginpangita sang iya mga himata.
Bangud sang kabalaka sang pamilya, nagpadulong ang mga ini sa nasambit nga building upod ang mga katapo sang PCG- Roxas. Sang ara na sa ikatatlo nga panalgan sang amo nga building, nasapwan na lamang ang bangkay ni Banico nga nagaka-agnas na.
Nahibaluan nga nakakandado ang nasambit nga hulot nga nahamtangan sang bangkay, rasun nga nabudlayan ang mga katapo sang PCG sa pagsulod diri. Samtang, nagapadayon pa ang imbestigasyon sang mga kapulisan agud hibaluon ang gintunaan sang kamatayon sang biktima.
Bantayan ang dugang nga detalye sa DYVR RMN Roxas
*(Photo from PCG-Roxas)*
