General Santos City—Samad sa likod nga bahin sa iyang ulo ang naangkon sa usa ka biktima nga giilang si Jobert Alejenio, 23 anyos, estudyante ug residenti sa Barangay Calumpang Gensan, human kining gibunalan ug bato sa wala mailhing suspetsado alas 12:15 ang takna sa tungang gabie sa may Salazar Street, Barangay South, Gensan.
Saysay sa mga amigo sa biktima gikan sila ug inum niadtong higayuna, niuli ang nasampit nga biktima nga nag inusara, samtang nagbaktas didto na kini giduol sa wala mailhing suspek dayon gibunalan ug bato sa likod nga bahin sa iyang ulo.
Paspas nga misibat ang suspek sa wala sayring lugar dala ang bag sa biktima nga dunay sulod nga kwarta kantidad ug kapin P4,000.00.
Gilayon man nga gidala sa ospital ang biktima sa mga nagpakabanang sibilyan. Sa karon nagpadayon pa ang gihimong imbistigasyon sa kapulisan kalabutan sa maong insidenti.
