Salug, ZDN-Patay ang usa ka indibidwal human kini naglisodug ginhawa samtang nagkalot ug atabay didto sa may brgy Tapalan, lungsod sa Salug sakop ning probinsya.
Naila ang maong biktima nga si Alexander O. Ignacio, 46 anyos nga taga Ipil, Zamboanga Sibugay ug lain pang duha nga na ospital nga sila si Tirso P. Barsabal, 54, lumolopyo sa brgy. Tapalan, Salug ug Angelito C. Tabanao, 55, taga Dacon Homes, Ayala, Zamboanga City.
Sa resulta sa pag imbistiga sa kapulisan sa Salug, nahitabo kini sa miaging huwebes nga kung diin didto kini sila sa lote ni Juanito Somoso ug tag-iya usab sa gi panday nga deep-well.
Kini si Juanito iyang gipatrabaho ang tulo ka mga biktima sa iyang luna ug nakakalot kini sa dili mo ubos 45 metros ang gilawmon ug didto na migamit ug water pump aron kuhaon ang tubig samtang nagkalot sila.
Gidala mismo sa mga biktima ang water pump sa ilawom sa ilang gikalot apan pipila lang ka minuto naglisod na sila ug ginhawa ug nasuka-suka na sila, gituohang na suffocate sa aso sa makina. Dali sila nga mikawas gikan sa ilang gikalotan apan samtang pasaka sila si Alexander Ignacio kalit lang nakuyapan ug nahagbong, maayong pagkaparok sa iyang ulo nga maoy hinungdan sa iyang diha-diha nga kamatayon.
Dali usab nga gidala sa balay tambalanan ang duha pa ka mga biktima ug karon luwas na sila. Samtang grabe usab ang ka guol nga gibati karon sa kabanay sa biktima tungod sa gidangatan niini.
