Nangin kaangay sang eksena sa pelikula ang paglinagsanay sang mga katapo sang CIDG kag sang grupo sang isa ka criminal group sa distrito sang Arevalo kagab-i.
Ginpahayag ni Police Chief Inspector Raul Dolido sang CIDG-Iloilo nga paga-serbehan nila kuntani sang warrant of arrest sa Villa Carolina Subdivision ang most wanted person sang Tigbauan nga si Regan Gepolanggo kag mga kaupod sini nga mga katapo sang Gepolanggo group.
Suno kay DolIdo nga isa ka gun for hire ang nasambit nga grupo kag may kaso nga murder.
Subong man, antis pa ma-serbe ang warrant of arrest, natunugan sang mga suspek ang mga otoridad kabangdanan nagsakay ang mga ini sa puti nga Isuzu Mu-x kag nagpalagyo kadungan sa pagpalupok sa mga pulis.
Bangud sini, ginlagas sang mga otoridad ang mga suspek tubtub nakalab-ot sila sa Yulo drive malapit sa Arevalo plaza kag didto ginbilin nila ang salakyan.
Wala na makit-an sang mga pulis kon diin nagderetso ang mga suspek apang nakuha sa salakyan sang mga ini ang granada kag armas.
