Mambusao, Capiz- Arestado ang duha ka mga persona nga nagbayolar sa curfew hour sa banwa sang Mamabusao samtang naga-epekto pa ang enhanced community quarantine(ECQ) sa probinsya sang Capiz.
Ginkilala ang mga ini nga sanday Jhon Dela Cruz Pediangco, 57-anyos ang pang-edaron nga isa ka casual employee sang LGU sang Sapian samtang ang driver sang ginasakyan nga pick-up ang ginkilala kay Jefrry Oboyes Pinalba, 47-anyos.
Pasado alas 11 sang gab-i sang ginharang sang nakadeploy nga kapulisan ang duha ka persona kun sa diin nadiskubrehan nga yara ang mga ini sa impluwensya sang makahulobog nga ilimnon.
Rason sang mga ini nga magapadulong sila sa botika(Mercury Drug Store) agud nga magbakal sang bulong apang napaslawan naman nga makapakita sang nagakaigo nga resita.
Wala pa makontento si Oboyes kag ginsilingan ang mga PNP Personnel nga “Mga bastos kamo, Sin-o gid kamo aw? Sin-o nasaligan niyo ay, Bisan tawagan niyo pa si Mayor. Mga aswang kamo!”
Sa interview sa hepe sang Mambusao PNP nga si Police Captain Edwin Luces, ginkumpirmar sini nga ila gindetain sa karsel ang amo nga mga persona kag natalana ang mga ini nga pasakaan sang nagakaigo nga kaso partikular ang paglapas sa curfew hour.
