TACLOBAN CITY – Nagkamayada hin gi-os protesta an mga nagpapakilala nga tag-iya hin lote nga gintitindugan han sanitary land fill ha Brgy. San Roque ha syudad han Tacloban agud manawagan ha City Government nga bayaran na hira han tuna nga gintitindogan han proyekto han lokal nga pamunuan nga ginsaad dida pa han 2015.
Sumala kan Ernie Flores, usa ha mga nag protesta nga karuyag gud nira maka istorya hin personal hi Mayor Christina Romualdez. Panuyuan han pagbuhat nira han protesta agud ipasabot nga pira na hira ka tuig nga waray kababaydi.
Pero sumala kan Tacloban City Administrator Atty. Irene Chui, nga antis pa igtindog an mao nga proyekto in gintugutan hira han Provincial Environmental Office lakip an dukomento nga nagpapakita nga parte ha forestry han Tacloban City an lugar ngan diri pwedi ma-privatized.
An City Gov’t daw in natigdaan nga may-ada ginpakita nga titulo han tuna tikang ha Department of Agrarian Reform han mga nagpapakilala nga nagtatag-iya han mao nga lugar.
An gin-aariglar yana han City Government nga mabayaran an road right of way tipakadto ha sanitary landfill kun diin ginsiguro naman han City Government nga mabayaran.
