Dakup sa isa ka entrapment operation ang nagpakuno kuno nga major general kag walo ka iban la 1:05 kahapon sang hapon, Hulyo 24 sa Andrea Village, Barangay Zone 2, ciudad sang Cadiz.
Ginkilala ang “kuno” major general nga si Joel Famoso, temporaryo nga nagapuyo sa Barangay Mandalagan, ciudad sang Bacolod kag tumandok sang Tacurong City sa Sultan Kudarat.
Ginpahayag nga nagapatigayon sang investment scam sa ciudad sang Cadiz kag Negros Occidental ang suspetsado. Si Famoso ang may order of arrest para sa kaso nga Estafa kag alias warrant of arrest sa kaso nga Usurpation of Authority kag Estafa nga gin-issue sa La Trinidad, Benguet.
Magluwas kay Famoso naaresto man ang mga upod sini nga sanday Ruel Telebrinco sang Guinhalaran, Silay City; Arman Casuyon sang San Pedro, Binalbagan; Juanito Gardoce sang Barangay E. Lopez, Silay City; Ivy Biñas sang Poblacion, Tacurong City, Sultan Kudarat; Hazel Sharon Duclayan, Harriet Piamonte kag Heide Visitacion sang Zamboanga City kag Danellen Iligan sang San Teodoro, Binalbagan.
Nakuhaan man si Famoso sang fragmentation grenade kag mga identification cards kag duha ka .38 calibre revolver sa duha sini ka mga upod.
Ginpatigayon ang entrapment operation sa gintingob nga pwersa sang Cadiz City PNP, Negros Occidental Police Provincial Office kag Tacurong City PNP.
<www.avg.com/email-signature?utm_medium=email&utm_source=link&utm_campaign=sig-email&utm_content=webmail>
