MURCIA, NEGROS OCCIDENTAL – Ginapadalman na karon ang imbestigasyon agud mahibaluan kon bala may foul play ukon plain suicide gid man ang natabo sa isa ka lola nga ginaalegar naghikog kagab-i sa ila mismo balay sa Brgy. Blumenttrit, banwa sang Murcia.
Ang biktima isa ka 83 anyos nga lola kag pumuluyo sang isa ka subdivision sa Blumenttrit, banwa sag Murcia.
Suno sa Murcia Police Station sa pagpanguna sang ila hepe nga si Police C/Insp. Roberto Indiape nga may mga las 7:20 kagab-i nakabaton sila sang tawag halin sa kaingud balay sang biktima nga may naghikog sa ila lugar.
Sang nagpadulong ang pulis sa lugar, didto kag ila nakita ang sunog nga lawas sang biktima kag wala na sang kabuhi.
Base sa ila imbestigasyon, ang biktima ang nagsunggod matapos nga ini sila ang nag-away sang iya bata nga laon nga babaye, 61 anyos.
Nadugangan pa ang kasubo ni lola matapos nga ginpagwa ini sa ila balay kag ginsirad-an ang gate.
Bangud sini, ginsiling nga nagbakal sa banwa sang gas kag posporo ang biktima kag ginsindihan ang iya kaugalingon sa bakante nga lote, sa atubang sang ila balay.
Sa interbyu sang dyHB sa laon nga bata ni lola, iya ginpahayag nga indi na mapunggan ang kainit sang iya iloy, nagpamahog pa ini nga tutdan ang ila balay, kag ginahanaan pa nga bun-on sang stick sang inasal ang iya hinablos, rasun nga napilitan ini nga pagguwaon ini sa gate.
Masami na ini nga batasan sang iya iloy rasun sang indi nila pag-insendihanay. Saksi man diri ang ila mga kaingod sa nangin batasan sang iya nanay.
Sa karon naga depende sa pamilya sang biktima ang desisyon kon igapaidalum pa sa autopsy ang bangkay ni lola./dyHB BACOLOD
