Nagpaluyo sa bomb threat, gi-imbestigahan sa DCPO

Davao City – Ginalantaw karon sa Davao City Police Office (DCPO) ang posibilidad nga usa lang ka indibidwal ang nagpaluyo sa bomb threat nga nadawat sa upat ka eskwelahan sa Davao City.

Sa interbyu sa DXDC RMN Davao kang Police Captain Hazel Caballero Tuazon, ang tigpamaba sa DCPO, gisulti niya nga lakip sa gi-imbestigahan nga posible estudyante o grupo ang responsable sa maong pagpanghulga sa bomba.

Subay niini, nagpahimangno ang DCPO nga kung naay mga indibidwal nga nakabalo o nalambigit sa bomb threat, mamahimong motawag ngadto sa duol nga police station o motawag sa Central 911 aron kini matagaan og hinanaling aksyon.

Kahinumduman nga upat ka tulunghaan sa syudad ang nakadawat og bomb threat — una ang mga eskwelahan sa F. Torres Street ug Mintal, Tugbok District ning syudad — ug kagahapon adlawa, Oktubre 23, 2025, ang laing duha sab ka eskwelahan ang nakadawat og bomb threat nga nahimutang sa Sasa ug Talomo. Human sa gihimong paneling ug clearing operations, nasayran nga nag-negatibo kini sa eksplosibo.

‎ RadyoMan Don Pulayao