San Miguel , Iloilo – Lipong ang 31-anyos nga asawa matapos naglumpat sa traysikol bangud nagapangimon sa iya bana.
Suno kay PO3 Billy Salvilla, imbestigador sang San Miguel Municipal Police Station, nagbaisay ang mag-asawa samtang papuli na sa Brgy. Igtambo , San Miguel matapos nagbakal sang bulong sa banwa sa diin, ginamaneho ni alyas Romeo, 37 anyos ang traysikol samtang ang iya asawa nga si alyas Juliet, 31 anyos ang nagasakay sa sidecar.
Ginpahayag ni Salvilla nga wala ginpakita ni Romeo kay Juliet ang bulong nga ginreseta sang doktor rason nga nangakig si Juliet.
Sang nag-init ang pagbina-isay, naglumpat si Juliet sa traysikol kag wala gid mahawidan sang iya bana.
Lipong nga gindala sa hospital si Juliet kag santo sa impormasyon, yara na ini sa estable nga kondisyon.
Base sa imbestigasyon sang San Miguel PNP, natak-an ang bana sa pagduda sang asawa bangud masami ini nagapangakig kag nagapamangkot sa tagsa ka tion nga maglakat ang bana .
Nahibaluan nga may 16 days old nga lapsag ang mag-asawa.
(photo from web/ not the actual photo)
