NAGSUICIDE UKON GINTIRO | Cadiz City PNP blanko pa kon anu ang natabo kay Mr. Geronga

CADIZ CITY – (2nd Update) Nagapadayon pa ang imbestigasyon sang mga katapo sang SOCO kag kapulisan sa Cadiz City kon bala nagsuicide ukon gintuyo gid man nga patyon si Mr. Eric Geronga, 37, Head Teacher sang Aniceto Lacson Elementary School sa Brgy. Burgos.

Si Geronga ang pumoloyo sang sang Santa Maria Pueblo Subdivision, Brgy. Daga sa diin ang bangkay sini ang nasapwan pasado alas 12 kaina sang udto nga nagakaya sa kampo sang tubo mga 500 metros ang antad sa ila nga balay.

Sa pagpangusisa sang dyHB sa crime scene paagi kay RMN Correspondent Joel Abilay, si Geronga ang may igo sang bala sa tuo nga bahin sang iya nga ulo sa diin ang bala wala nakalapos.


Nakita naman sa iya tiilan ang .357 kalibre nga armas luthang nga may lima ka bala nga wala kalupok, kag basiyo nga posibli amu ang nag-igo sa iya.

Sa pahayag sang asawa nga si Gina, ginsiling sini nga pasado las 7 kagab-i, ginhagad niya ang iya bana nga magtambong sang Alumni Homecoming sang Dr. Vicente Gustilo Memorial National High School apang nagpamalibad ini nga mag-upod bangod kapoy sya.

Sang naglakat ang iya asawa, nagguwa man ini sa ila balay kag naglakat lakat paguwa posibli nagpahangin hangin.

Sa CCTV footage, las 7:26 may nasugata pa ini nga magnobya nga nagasakay sa motor apang nag-agi manlang ini sa iya. Pila ka minutos ang nakalipas didto na natabo posibli ang pagluthang niya sa iya kaugalingon, ukon may nagtiro sa iya.

Tuman ka lapit sang tiro bangod wala nagguwa ang bala sa iya nga ulo sa diin isa ka anggulo nga ginalantaw ang suicide, bangod ara ang iya nga pusil, narecover ang basiyo sang .357 nga pistola kag wala man nadula ang iya mga pagkabutang.

Indi man malayo nga gintiro ini sa tuman ka lapit sa diin posibli nakapalupok man sya sang iya nga armas, ukon iya man armas ang gingamit.

I-confirm nalang sang mga katapo sang Scene of the Crime Operatives (SOCO) kon bala, .357 gid man nga bala ang nag-igo sa iya ulo ukon man iban nga pusil nga nakaigo sa iya. / Pictures from his Facebook/ Tagged by his close friends

Facebook Comments