Tapaz, Capiz – Naglab-ot sa 221 ka mga bag-o nga suldado ang nagtapos kag nagsumpa na sa ila katungdanan bilang katapo na sang Philippine Army sang kahapon nga adlaw kadungan sang ginpatigayon nga Graduation and Ceremonial Entrustment of Firearms sa 3rd Infantry (Spearhead) Division sang Philippine Army sa Camp General Macario Peralta, Jr., sa banwa sang Jamindan, Capiz.
Ang nasambit nga programa ang ginpangunahan ni Major General Dinoh A. Dolina, Division Commander sang 3rd ID, PA. Naghatag man sang iya mensahe si bilang guest speaker si Mayor Roberto Palomar sang Tapaz, Capiz. Ang mga bag-o nga suldado ang nagpaidalom sa tatlo ka bulan nga Candidate Soldier Course kag Jungle Warfare Mountain Operation Course sa Training School sang 3rd ID.
Nagbaton naman sang Commander 3rd Infantry Division Award sanday Private Gideon Fusin matapos nagpanguna sa 112 ka mga suldado sa idalom sang Class 556-2018 nga may general point average nga 94.15% kag Private Jenhrod Maceda nga nagpangibabaw man sa 109 ka mga suldado sang Class 557-2018 nga may general point average nga 94%.
Ginsaksihan man sang mga matag-as nga opisyal sang Philippine Army mga local officials sang LGU kag pamilya sang mga bag-o nga suldado ang nasambit nga programa.
