Roxas City, Capiz – Nagpakig-upod si Governor Tony del Rosario sa kasubo sang pamilya ni anay Board Member kag Provincial Sports Consultant Jose Peping Diaz nga nagtaliwan sang nagligad nga Nobyembre 10, 2017.
Ginpahayag sang gobernador nga isa ka dako nga kadulaan sa ginadihon nga Sports Development Program sang Provincial Government si Peping bangud aktibo ini kag maayo nga sports consultant.
Suno pa kay del Rosario, ginatun-an pa sang iya talatapan kon sin-o ang igabulos sa ginbayaan nga posisyon ni Peping agud nga magpadayon sang mga gin-umpisahan sang anay opisyal. Nagakadapat man suno sa gobernador nga hatagan sang mataas nga honor si Peping bangud nagserbisyo man ini sa probinsya sang tatlo ka termino bilang board member.
Nagpapasar man sang isa ka resolution ang sangguniang panlalawigan sa pagpanguna ni Vice Gov. Esteban Nonoy Contreras, nga nagapalab-ot sang simpatiya sa pamilya kag ginahinyo ang mga talatapan sang gobyerno sa bug-os nga probinsya nga ipaidalum sa half mast ang hayahay sang pungsod bilang respeto sa nagtaliwan nga opisyal.
Samtang gindala kahapon nga adlaw ang bangkay ni Sports Consultant kag former Board member Jose Peping Diaz sa session hall sang Sangguniang Panglalawigan, Provincial Capitol para sa public viewing kag ginsundan ini sang necrological service.
Kalakip sa mga naghatag sang ila pahayag amo si former Governor kag subong Pontevedra Mayor Esteban Dodoy Contreras kag Business and Sports Consultant, Mrs. Carmen Andrade. Gindala naman ang bangkay ni Diaz sa iya nga poluy-an sa Brgy. Salgan, Maayon, Capiz agud makaupod man ini sang iya mga himata sa katapusan nga kahigayunan.
(c) Capiz Aksyon News Center
