Ginakabig nga mariit ang lugar nga ginluntaran sang aksidente sa bukid nga bahin sang barangay Fabrica, Hamtic, Antique kon sa diin nahulog sa pil-as ang Ceres bus pasado alas 9 kagab-i.
Sa nasambit nga aksidente, tatlo ang napatay nga ginalakipan sang duha ka lalaki kag isa ka babaye.
Ginkilala ang mga napatay nga amo sanday Vivien Omanio kag bata sini nga si Earl Omanio, bag-o lang nag-graduate sang Marine Engineering sa JBLFMU-Arevalo kag si Bebe Chicano sang Guinbangaan, San Jose, Antique.
Suno kay Police Sr. Master Sgt. Liane Adores sang Hamtic PNP nga ang ginluntaran sang aksidente amo man ang nahulugan sang truck nga may karga nga semento sang nagligad nga tuig.
Ginpahayag naman ni SB member Edmand Sumaculub sang Hamtic, Antique nga sa amo man nga lugar nahulog ang Family Express bus sang 1988 ukon 31 ka tuig na ang nakaligad kon sa diin lunsay patay ang 31 sini ka mga pasahero matapos naglupok kag nasunog ang nasambit nga bus.
