Davao City – Gikatakdang maglusad og imbestigasyon karong Agosto 29 bahin sa nahitabong insidente sa Ninoy Aquino International Airport (NAIA) diin liboan ka mga pasahero ang na-stranded.
Atol sa interbyu kang Sen. Joseph Victo ‘JV’ Ejercito sa tulumanong ‘Straight to the Point’, sutaon nila ang tinuod nga nahitabo ug masayran ang reaksyon sa Civil Aviation Authority of the Philippines (CAAP), Manila International Airport management ingon man gi-unsa pagtratar sa mga airlines ang ilang mga pasahero.
Gitataw ni Ejercito nga kaniadto pa’ng tuig 2016 nipasa siya og resolusyon bahin sa over capacity ug congestion sa NAIA gumikan aduna nay air traffic problems na kaniadto.
“By international standards, ang mga international airport dapat merong dalawang parallel runway so para sa akin ang NAIA now with one runway for international and one for domestic at intersecting pa magkakaron talaga ng problema katulad ngayon,” segun niini.
Sumala sa senador nga usa siya sa mga nastranded diin nakita mismo niini ang sitwasyon sa mga pasahero sama sa paghigda sa salog ug bisan asa.
Samtang gibutyag ni Ejercito nga kinahanglan og dugang terminal building sa Davao aron mas maka-akomodar pa og laing airlines.
Kahinumdoman nga kaniadtong adlaw’ng Huwebes, Agosto 16, sa gabii nadalin-as gawas sa runway ang Xiamen Air Flight MF8667 diin miresulta sa pagkadelatar ug kanselasyon sa pipila ka mga international ug local flights.
RadyoMaN Jason Amisola
