NAIGO MAN SI POJA | No. 1 Most Wanted Ramy Poja posibli naigo man, hepe pilason, duha pa nasalabat sa firefight sa Sibucao

BACOLOD CITY – Nasalabat ang mag-iloy sa police operation nga ginpatigayon kaina sang kaagahon agud kuntani i-serbe ang warrant of arrest batuk sa wanted person nga si Ramy Poja matapos nga nag-bato ang iya grupo sa mga operatiba sa Brgy. Banago.

Nakilala ang mga biktima nga amo sanday Erlinda Cordova, 63 anyos kag anak niya nga si Jolan Cordova, 20 anyos lunsay pumuluyo sang Purok Sibucao, Banago.

Ginpahayag nga may mga la 12:30 kaina sang kaagahon, nag-operate ang Police Station 3 para i-serbe ang warrant of arrest batuk kay Ramy Poja apang ini ang namutikan sang iya grupo gani natabo ang pagbayluhanay sang luthang.


Bangud sini, nasalabat ang mga biktima nga sa amo nga tion yara sa sulod sang ila balay kag naigo ang iloy sa iya kamot samtang may igo naman sa iya kilid ang bata gani ini sila ang gindala sa ospital.

Una nga naigo si PSInsp. Victor Paulino, hepe sang Station 3 sa iya duha ka tiil sang ginpatigayon ang operation kag ara subong ginabulong sa Bacolod Adventist Medical Center.

Padayon nga nangin madanlog si Poja kag sa gihapon, wala ini nadakpan.

Suno kay BCPO Director PSSupt. Francisco Ebreo ginahimo sang PNP ang pagpangusisa sa mga ospital, bangod sa ila report posibli nga pilason man si Poja.

Si Poja ang ginakonsedera nga Most Wanted sa area sang Station 3.

Sa amo man nga operasyon natigayon naman nga madakpan ang apat ka iban pa gid nga mga suspek sa akto na nagahampang sang illegal gambling ukon pusoy.

Ini sila amo sanday Jerry Pama, 32 anyos, residente sang Brgy. Zone 5, Talisay City, Reymark Dalisay, 21 anyos kag Regie Edianel, 32, lunsay pumuluyo sang Sitio Sibucao, Banago kag si Neil Laquina, 23 anyos sang Brgy. Zone 10, Talisay./dyHB BACOLOD

Facebook Comments