Roxas City, Capiz- Arestado ang kawatan nga nagsulod sa isa ka panimalay sa Purok Uno Barangay Libas, Roxas City alas 4:45 sang kaaganhon.
Ang suspek ang ginkilala kay alyas Jan-jan Cernicola y Delos Reyes, 27-anyos kag residente man sang nasambitan nga lugar.
Natigayon nga marekober sa suspek ang 400 pesos nga cash, kulintas kag aritos nga ginsulod pa sini sa iya brief.
Nadakpan ang amu nga persona matapos nga nabatyagan sang tagbalay nga si Epefania Nalica, 69-anyos ang pagsulod sang amu nga suspek sa ila poluy-an.
Sang ila ginpangita, nadiskubrehan ang suspek nga yara nagapanago sa idalom sang katre. Ini ang wala sang bayo ukon short kag naka-brief na lamang!
Nahibaloan nga may yara sang dipirensiya sa paminsaron ang amu nga suspek. Samtang sa interview sang news team kay Epefania Nalica, indi naman ang mga ini interesado nga magpasaka sang kaso sa suspetsado bangud nga kilala nila ini kag bangud sa estado sang mentalidad sini.
Base sa interview sa iloy, posible nga dala sang epekto sang ilegal nga druga ang natabo sa anak sini. Sa subong yara na na-detain sa Barangay Hall sang Brgy. Libas ang amu nga suspek.
