South Cotabato–Padayon pa karon ang gihimong imbestigasyon sa kapulisan kalabutan sa nakit-ang patay ‘ng lawas sa estudyante sulod sa manukan nga si Charls Jirwin Abadiano, 28 anyos, nga nanimuyo sa Purok Ilang-Ilang, Barangay Malaya, Banga South Cotabato pasado alas 8:00 sa buntag sa Sitio El Negros, brgy.San Vicente sa nasampit nga munisipyo niadtong adlawa’ng Biyernes.
Sumala pa ni Police Major Joseph Forro ang Chief Of Police sa Banga MPS nga usa ka dayo ang biktima sa lugar ug pugsanon niining gisulod ang manukan nga pangsabong pinaagi sa pagkat-kat sa pader nga walay pananghid.
Gipaklaro usab ni Forro nga sa dihang ilang gisubay ang sulod sa manukan nakita niini ang biktima nga dunay mga samad sa tiil, sa ulo nga gituohang nasamad sa alambre ingon man paso sa kamot niini.
Gikabutyag man usab ni Police Major Joseph Forro nga basi sa ilang bana-bana posibleng paso sa kuryente ang ilang nakita sa kamot sa biktima.
Apan dili pa nila makumpirma kung mao ba gayud kini ang hinungdan sa kamatayon sa nasampit gumikan kay basi sa ilang imbestigasyon wala matud pa silay nakitang ebedensiya nga dunay live wire sa pader sa manukan.
Saysay usab sa opisyal nga dili pa nila mabutyag kung unsa ang motibo sa estudyante sa iyang pagsulod sa manukan gumikan kay wala pa silay ebedensiya nga magpamatuod ug aron usab dili malain ang pamilya niini.
Dugang asoy ni Police Major Joseph Forro nga ilahang gikonsidera ang tanang posibleng hinungdan sa kamatayon sa estudyante ingon man ang motibo niini sa pagsulod sa manukan.
Sumala pa ni Forro nga ilaha na lamang gihulat ang mahimong resulta sa autopsy nga maoy ilahang mahimong basehan sa hinungdan sa kamatayon niini.
Gibutyag usab sa opisyal nga nakit-an na lamang sa caretaker sa manukan ang biktima nga wala nay kinabuhi sa sulod dihang nagpakaon kini sa mga manok ug nasayran usab nga kanhing surrenderee ang nasampit nga nalambigit sa illegal nga droga.(Reynald Timario)
