Ginkumpirmar sang pamunuan sang A.P. Moller- Maersk nga nakita na ang tatlo sa apat ka na-missing nga crew sang nasunog nga Maersk Honam sang nakaligad nga Marso 6 sa Arabian sea.
Ginpahayag ni Chief Operating Oficer Soren Toft nga nakita ang bangkay sang tatlo sa ibabaw sang nasunog nga barko.
Suno kay Toft nga mabudlay na nga makilala ang mga bangkay, apang napahibalo na ang tagsa ka pamilya sang mga ini.
Nahibaluan nga sa apat ka na-missing nga crew, duha diri ang mga Ilonggo nga estudyante sang John B. Lacson Foundation Maritime University.
Ginpasiguro man sang nasambit nga kumpaniya nga pagahatagan nila sang nagakaigo nga suporta ang natungdan nga mga pamilya sang mga biktima.
Bangud sini, padayon sa gihapon nga pangitaon sa barko ang isa pa ka missing nga crew.
Ang duha ka mga Ilonggo seaman nga engine cadets nga una ginreport bnga missing amo sanday John Rey Begaso kag Janrey Genovatin samtang napilasan si Carl Vincent Chan nga lunsay mga estudyante sang John B Lacson Foundation Maritime University.
