Panit-an, Capiz – Pilason ang 55-anyos nga tiyo matapos ini ang nalab-an gamit ang espading alas 10 sang gab-e sa Brgy Balatucan banwa sang Panit-an.
Ang ginatudlo nga suspek ang mismo gumangkon sini sa pakaisa nga ginkilala kay Ruel Denosta, 17-anyos ang pang-edaron.
Ginkilala ang biktima kay Rebeco Dejapa y Bialen nga residente sang nasambitan nga lugar nga nag-angkon sang kapilasan sa iya guya, kamot kag tuhod matapos ginlabo sang gumangkon nga suspek.
Base sa imbestigasyon sang Panit-an PNP, magka-upod nga naga-inom ang duha sang hinali nga nagluntad ang pagpuis sa mga ini kabangdanan nga nag-una sa paglakat ang suspek.
Likom sa ihibalo sang biktima, ini gali ang ginbantayan sang suspek kag didto ginlabo nga nagresulta sang pagkapilas sini.
Natigayon naman nga madakpan sang mga kapulisan ang 17-anyos nga suspek kag sa subong ang nakahunong sa Panit-an PNP.
Ang indi pag-intindihanay bangud sa kahulogbon amo ang ginatudlo motibo sang krimen.
