ROXAS CITY, CAPIZ – Gina-ekspektar sang DOH-Capiz nga labi pa nga madugangan ukon magataas ang numero sang mga nabiktima sang palupok sa Capiz kadungan sang pagsug-alaw sang Bag-ong Tuig.
Base sa pinakaulihi nga record, ginsiling ni Mr. Joeffry Espiritu, Development Management Officer IV sang DOH-Capiz nga naglab-ot na sa 26 ang kaso sang firecracker-related injuries sa probinsya halin Disyembre 21, 2018 sang sila ang umpisa nga nagpatigayon sang reporting kag monitoring.
Ginsiling sini nga ang nasambitan nga numero subong nga tuig ang mas mataas kun ikumparar sa kapareho nga period nga nalista sang 2017 nga nga naglab-ot lamang sa 22 ka mga persona.
Suno kay Espiritu, ginahulat pa nila sa subong ang opisyal nga report halin sa mga rural health units(RHU) kag mga ospital angut sa datos sang mga nabiktima sang palupok.
Ginalauman nga madugangan pa ang nasambitan nga numero tubtob sa Enero 5, 2019 nga amo ang gintalana sang DOH nga katapusan nga adlaw para sa monitoring sa mga firecracker-related injuries.
