Davao City – Hugot karon ang koordinasyon sa Barangay Mandug, Davao City sa kasilinganang barangay ugaling ilang makita ang nalumos nga batang lalaki pasado alas-12 sa udto kagahapong adlawa (October 7, 2021).
Sa interbyu sa DXDC RMN Davao kang Arnold Crisostomo, Brgy. Official sa Mandug, gisaysay niini nga matud sa nakasaksi sa insidente, nagsakay og bangka ang 6-anyos nga biktima uban ang iyang igsoon sa dihang kalit lamang kining niambak, hinungdan nga nadala kini sa kusog nga bul-og sa tubig.
“Nilukso daw kining maong 6-anyos nga bata. Unya syempre, tungod sa kakusog sa pressure sa maong tubig, naanod. Giaksyonan pa ‘ni og gukod sa magulang pero wala na ‘ni naapsan kay niadto ‘ni sa portion nga naay lilo ba,” saysay ni Crisostomo.
Gipangunahan sa Davao Central 911 ug Barangay Mandug Responder ang retrieval operation kagahapong adlawa ug gihunong alas-5 sa hapon human pakyas nga nakaplagan ang biktima.
Pahimangno sa Brgy. official labi na sa mga ginikanan nga imonitor, bantayan ug badlongon ang mga anak sa pagligo sa mga sapa aron kalikayan ang susamang insidente.
RadyoMaN Kirby Manzon
