Dao, Capiz – Patay na sang makit-an ang 50-anyos nga persona las 7:40 sang aga samtang nagalutaw ang lawas sini sa suba sang Brgy. Duyoc, Dao, Capiz.
Ginkilala ang biktima sa kay Romy Estorque y Esmidio, pomuluyo sang Matagnop, Dao, Capiz.
Sa imbestigasyon sang mga kapulisan, ulihi nga nakit-an ang biktima sang nakaligad nga Enero 23, 2018 alas 2:30 sang kaagahon upod sang iya mga gumangkon nga sanday John Mark Esmidio kag Walter Dili halin sa bilasyon.
Ini pa ang ginhagad sang iya mga gumangkon nga magpangaldo sa banwa apang namalibad ang biktima.
Ginapatihan sang mga otoridad nga nadanlog ang hubog nga biktima samtang nagatabok sa tulay kag nahulog sa suba rason sang iya pagkalumos.
Base sa ginpatigayon nga post-mortem examination sang mga otoridad, wala naman sang may nakit-an nga pilas sa lawas sang biktima nga patimaan nga may yara sa foul play sa kamatayon sini.
