Namaligya’g peke’ng cellphone gihataga’g konsiderasyon sa NTC-XI

Davao City – Gihatagan karon og konsiderasyon sa National Telecommunications Commission (NTC-XI), ang mga nagbaligya og peke nga cellphone.

Atol sa One Davao on COVID-19 Virtual Presser, gibutyag ni Nelson Cañete, Regional Director sa NTC-XI, nga bisan sa kampanya sa buhatan batok sa mga nagapamaligya’g peke nga cellphone, gi-tolerate usa nila ang nahisgutan labi na panahon sa lisod nga sitwasyon gumikan sa Coronavirus Disease 2019 (COVID-19).

“Ingon nako, nga kung magpa operate ‘ta og mga ing-ana nga tindahan (nagabaligya’g peke) mura’g gikuhaan nato’g panginabuhi ‘ning mga tawahana ‘ning panahon sa COVID. Siguro, by humanitarian consideration, dili namo gi-allow, gi-tolerate lang sa namo sila for the meantime,” esplikar ni Cañete.

Matud ni Cañete, ang mga buyers kun nagapalit og cellphone na lamang ang magseguro nga dili mabiktima sa peke nga gadget. Gibutyag usab sa NTC-XI Regional Director, mas nidaghan ang nagabaligya’g cellphone o ginatawag nga ‘talipapa’ samtang mi-ubos usab ang mga nagapamaligya’g cellphone sa mga mall nga apektado usab sa pandemic.

RadyoMaN Kirby Manzon