TACLOBAN CITY – Patay an nanay ngan an iya anak matapos araruhon han usa nga SUV an pito nga sarakyan ha Brgy. Mancol, San Jorge, Samar kakulop, September 3.
Subay ha report han Police Regional Office 8, ginkilala an mga biktima nga hira Jovelyn Plana, residente ha nasabi nga lugar ngan an iya anak nga hi Anthony Plana, 5 anyos.
Ginkilala naman an suspek nga hi Roland Alegria, 50 anyos, may asawa, usa nga public school teacher, residente ha Brgy. Mabuligon, Matuguinao, Samar.
Nagawas ha imbistigasyon han mga otoridad, malaksi an padalagan han suspek han iya sarakyan tikang ha Catbalogan Samar, ha pag-encroached hini ha usa nga lane han highway “aksidente” nga nabunggo han iya sarakyan an mga biktima pati na an pito (7) nga sarakyan.
Apil gihap nga nabunggo han suspek an Barbecue stand han biktima nga hi Jovelyn.
Nadara ha hospital an mga biktima pero dead on arrival na ini.
Maatubang naman an suspek hin kaangayan ga kaso.
