Sa interview sa DXDC RMN Davao kang PMSg. June Roy Españo, imbestigador sa Magsaysay Municipal Police Station, iyang giila ang biktima nga si Benjie Duyan, 40 anyos samtang ang suspect nailang si Joydie Lacia, 42 anyos, pulos residente sa maong barangay.
Saysay sa imbestigador nga Araw ng Barangay niadtong panahona sa dihang nang-disco ang duha nga naka-inom. Samtang naa sa discohan, didto na gisiko matud pa sa biktima ang suspect rason nga nasuko. Samutan pa nga duna nay atraso daan ang biktima sa suspect nga giwatan matud pa og manok.
“Nagsayaw-sayaw silang duha unya ningduol daw ning biktima unya gisiko siya (ang suspect). Nag-init iyang ulo kay nakit-an niya ang iyahang kabikil sa ilang away sa manok. Mao ‘to nga nawala daw iyahang panan-aw. Niuli sya. Nakadesisyon sya nga kuhaon ang kutsilyo sa ilang balay. Pagbalik mao na ‘to gibuhat niya, gidunggab (ang biktima),” saysay sa imbestigador.
Nakahiagum ang biktima ug siyam ka dinunggaban sa lawas hinungdan sa iyahang kamatayon. Gilayon usab nga naaresto ang suspect nga mag-atubang og kasong murder.
RadyoMaN Kirby Manzon
