Davao City – Wala na makaabot nga buhi sa Davao del Sur Provincial Hospital ang usa ka mister human lubaa sa bayaw nga nahitabo sa Purok Talisay, Luna Extension, Digos City 9:00 sa buntag niadtong Sabado.
Deklarang DOA sa doktor sa maong tambalan si Jhun Charlie Comilang, 40 anyos nga nagpuyo sa maong lugar human nakahiagom og samad dinunggaban sa dughan nga bahin.
Sa wala pa mahitabo ang krimen, pareho nag-inom ang biktima ug ang asawa niini uban ang pipila nila ka silingan kuyog ang bayaw’ng suspek nga si Roselle Cuaton sa nasangpit nga lugar.
Apan nag-away ang magtiayon sa wala pa matino nga rason hangtud misangko sa pagdinapatay sa duha.
Gibadlong sa suspek ang biktima nga dili pasakitan ang iyang igsoon butang nga gikasuko ni Jhun maong gisagpa ug gisumbag niini ang suspek.
Tungod sa gibuhat ni Jhun, mikuha og mahait nga hinagiban si Roselle ug wa’y daghang istorya giduslak niini ang dughan sa biktima nga miresulta sa iyang hinanali nga kamatayon.
Daling misibat ang suspek apan sa gilusad nga manhunt operation sa Digos City Police Office nadakpan ra sab si Roselle 4:00 sa hapon sa samang adlaw ra gihapon.
Gihikay na ang tukmang kasong pagpatay batok sa suspetsado kinsa preso na karon sa istasyonan sa kapulisan sa dakbayan sa Digos.
RadyoMaN Joel Viray
