Davao City – Kasong grave threat ug illegal possession of firearms ang atubangon ni Reynaldo Pakiaw, 40 anyos, suspek sa pagpanion og pusil sa Bagumbayan, Brgy Zone III, Sta. Cruz, Davao del Sur niadtong Martes sa gabii (August 24, 2020).
Sa interbyu sa DXDC RMN Davao kang P/Maj. Crisaldo Gaila, acting Chief of Police (COP) Sta. Cruz Municipal Police Station, giila ang biktima nga si Glenn Vone Bargan, 19 anyos, anak sa kapuyo sa suspek.
Matud pa, kalit na lamang nasuko kaniya ang suspek tungod sa paggamit sa motor niini nga miresulta sa pagtion og pusil ug maayo nalang nga wala kini nakabuto.
“Ang hinungdan sa pagpanion niya nasuko siya kay gigamit sa biktima ang iyahang motor nga wala siya kabalo. Kadtong panahona wala pud siguro siya sa iyang sarili kay matud sa istorya nakainom siya og ilimnong makahubog,” matud ni Gaila.
Nisulay pa sa pag-ikyas ang suspek human sa insidente, apan nadakpan sa gihimong hot pursuit operation ug nakuha kaniya ang .38 kalebring rebolber ug unom (6) ka mga bala.
RadyoMaN Kirby Manzon
