Napalgang 2 ka patay’ng lawas sa magsaysay, ipa-autopsy

Davao City – Gipalawman karon sa Magsaysay Municipal Police Station (MPS) ang ilahang imbestigasyon kalabot sa kamatayon sa duha ka mga lalaki nga napalgan nalang sa Barangay New Opon, Magsaysay, Davao del Sur alas 9:00 sa buntag kagahapon, April 5, 2024.

Sa interview sa DXDC RMN Davao kang PSMS Ramil Locostales, imbestigador sa Magsaysay MPS, iyahang gibutyag nga usa ka concern citizen ang mi-report sa duha ka patay’ng lawas sa lalaki nga anaa sa 20-25 anyos.

Nagtuo ang imbestigador nga dili taga Magsaysay ang mga biktima nga padayon pa nga ginaila ang mga identity. Gitakda usab nga ipailawom sa otopsiya ang nahisgutan.

“Sa investigation sa amoang imbestigador didto, gipanghiktan ang ilahang kamot ug tiil. Naay labod sa ilahang liog. Atoa pa nang gi-autopsyhan kung unsay cause of death nila. Dili pa mi maka-identify gyud,” saysay ni Locostales.

Mamahimong mo-contact sa Magsaysay MPS Hotline: 0907-117-2000 kung sila dunay impormasyon sa insidente o kung sila nakaila sa mga biktima.

RadyoMaN Kirby Manzon