Roxas City, Capiz- Ginbawian na sang kabuhi ang BPAT member nga sakay sang traysikol nga nabunggoan sang kotse kahapon sang aga sa Kilometer 3 Barangay Lawaan.
Ginkilala ang biktima kay Samuel Berlandino y Andong, 51-anyos sang Sitio Patag Brgy. Lawaan nga nag-angkon sang pilas sa iya paa kag nagkatuhay nga parte sang lawas.
Ang amu nga persona ang sakay sang traysikol nga ginamaneho ni Jose Igloria y Lerio 41-anyos sang Brgy. Culasi Roxas City kun sa diin ang mga ini ang nabunggoan sang salakyan nga ginamaneho naman ni Elezar Dili y Duron, 59-anyos sang Ivisan kag nagapuyo na sa Mabini Street, Brgy Inzo Roxas City.
Nagaguha sa imbestigasyon sang mga kapulisan nga natulogan ang driver sang kotse samtang ginasubay sini ang dalan pabalik sa city proper halin sa pagdul-ong sang abyan sa Brgy. Cabugao, Roxas City. Nahibaluan nga naglapaw ang amu nga kotse sa lane nga ginasubay sang traysikol kag ini ang nabunggoan kun sa diin nagtabog pa sang kapin 17-metros ang ginasakyan sang mga biktima antes nga nagdasok sa poste sang Capelco.
