Ang suspek giidentipika nga si Darwin Aljon Cubellas, 23 anyos, taga- Purok 10, Muslim Vill., Brgy.9-A, San Rafael, Davao City
Gibutyag sa ugangan sa suspek nga wala na niatubang sa camera nga anaa sa lima ka mga nakasilbilyan nga mga lalaki ang nisulod sa kwarto.
Samtang kugos matud pa sa suspek ang iyahang anak gipusil kini sa kilid ug gitiwasan pa sa ulo.
Sumala niini walay nakaduol sa ilahang mga kabanay atol sa panghitabo.
“Kung para sa ako, kung naa may sala ilaha diay’ng dakpon ug prisuhon ug dili ingon atuon. Mura ra’g nagpatay ra’g iro ba naluoy man gani ka mubunal og iro kana pa hinuong tao. Sa akong kabahin nalibog ko ba… mubalik ra gihapon na sa ilaha,” segun niini.
Samtang gibutyag ni Police Major Marvin Hugos, San Pedro Police Station Commander, nagsumikad ang operasyon subay sa pagdangop sa usa ka babaeng biktima nga gitiunan matud pa sa suspek og pusil ug gidagit ang iyahang cellphone, pouch nga adunay cash ug gold bangle samtang gahulat kini og masakyang tricycle sa EMP Vill., Brgy.10-A ning syudad niadtong
Huwebes alas 7:00 sa gabie.
Busa nilusad gilayon ang kapulisan og hot pursuit operation batok sa suspek nga positibong naidentipika dihang gitudlo kini sa biktima sa gipakita sa kapulisan nga rogue’s gallery.
Narekober usab mga kinawat na items sa posisyon sa napatay nga suspek.
Gitataw ni Hugos nga nag-conduct na ang SOCO og imbestigasyon ug andam sila kung mupasaka man og complaint ang mga tagtungod kung kwestyuble ang ilahang operasyon.
“Pwedi man sila muduol ug mu-file sila og criminal complaint ug pwedi sad nila file-an og administratibo ang atong kapulisan kay kung adunay nakita ug ma-prove nila ilahang claim most probably matanggal ang atong police sa serbisyo. I assure you that ang atong kapulisan nag perform ra sila sa ilahang trabaho ug dili pod pwedi i-sacrifice sa atong kapulisan ang ilahang serbisyo,” segun niini.
RadyoMaN Aimee Guinita
