TACLOBAN CITY – Ginklaro han National Police Commission Region 8 nga epektibo la an “No height requirement” ha NAPOLCOM Entrance examination ngan diri ha Philippine National Police recruitment.
Ini in matapos magkamayada hin pagkalipat an publiko ha pagka-intindi han pagtanggal han NAPOLCOM ha height requirement ha entrance examination.
Sumala kan Mary Grace Bautista, Public Information Officer han NAPOLCOM Region 8, an requirements ha pag take han PNP entrance examination in iba ha general qualifications nga gin-rerequire ha recruitment para han qualified applicants ha Police Officer 1 nga nanginginahanglan hin atleast 1.62 meters o 5’4 ha lalaki ngan 1.58 meters o 5’2 ha babae.
Dugang pa niya nga an rason kun kayano gintanggal an height requirement ha exam in agud mapadali an pag-proseso han mga application.
Ginklaro gihapon han NAPOLCOM nga an pag take ngan pag-pasar ha PNP entrance examination in diri garantiya para makasulod ha pagka-pulis.
An height requirement in lakip la gihapon ha basic qualifications han PNP nga kinahanglan macomply han mga qualified applicants agud maging usa nga police.
