Roxas City, Capiz – Isa ka kasugtanan sa tunga sang Department of Agrarian Reform (DAR) sa probinsya sang Capiz kag Pilmico Foods Corporation ang ginselyuhan para sa napulo(10) ka agrarian reform beneficiary organizations (ARBOs) agud nga pasanyugon ang ila nga pangitan-an kag makadugang sa kita sa mga mangunguma nga membro sini.
Sa mensahe ni Regional Director Shiela Enciso, iya nga ginsiling nga pinaagi sa ginpatigayon nga memorandum of agreement(MOA) signing, ang mga ARBOs nga ginalakipan sang Traciano Farmers Multi-Purpose Cooperative (MPC), Esperanza Maclos MPC, Progressive Women ARC, Agdahon Farmers MPC, Pasol-o MPC, Agsirab MPC, ARC of New Guia, Brgy. Tapulang MPC, Yating Farmers Association kag Calitan MPC ang makabaton sang livelihood kits nagikan sa Aboitiz Foundation.
Ang Pilmico Foods Corp. ang isa ka integrated agribusiness kag food company sang Aboitiz Equity Ventures, Inc.
“Ang suportang ito ay magpapaunlad at magpapalawak sa kanilang kabuhayan na makatutulong sa pagpapanatili ng operasyon ng mga kooperatiba,” suno kay Enciso.
Samtang ginpahayag naman ni DAR-Capiz provincial agrarian reform program officer II (PARPO II) Anthony Arostique, may Php 1.3 milyon nga balor sang kantidad para sa probisyon sang suporta ang gintugyan sa mga ARBOs pinaagi naman sa tatlo(3) ka mga proyekto kapareho sang Project Bacon o Gild Livelihood Kit, Project Farina o Bakery Livelihood Kit, kag Project Omelette okun Egg Machine Livelihood Kit.
Ang kada probisyon sa proyekto ang sarang mahatagan sang Php 140,200 tubtob P520,000 para sa kada benepisyaryo nga ARBO depende sa ikasarang sang kooperatiba.
‘’Ang suportang serbisyo na ipagkakaloob sa inyong kooperatiba ay nakasisigurong makababawas ng hirap ninyo dulot ng pandemya. Umaasa ako na palalaguin ninyo ito upang matulungan ang inyong samahan, ang mga kasapi at mga magsasakang-benepisyaryo,” suno kay Arostique sa mga benepisyaryo.
Ang mga ARBO nga nagbaton sang proyekto ang nagpromisa nga dublehon nila ang papursige agud nga mas mangin produktibo kag masiguro ang kadalag-an snag nasambitan nga proyekto nga gintugyan sa ila sang DAR.
Ginsiling naman ni PARPO I Alona Albances nga ang suporta nga serbisyo para sa kooperatiba ‘timing’ bangud sa subong nga pandemya.
Samtang kalakip sa mga nagtabung paagi sa pisikal kag virtual MOA signing amu sanday Chief Agrarian Reform Program Officer (CARPO) Leonor Lena Juliet, CARPO Lea Ubierna, mga tiglawas nagikan sa Pilmico Manuel Villanueva Jr. kag Gregory Canay kag representante gikan sa central office Bureau of Agrarian Reform Beneficiaries Development (BARBD) Jeffrey Dalangin.
via – DAR
