Davao City – Dili kampante ang Parish Pastoral Council For Responsible Voting (PPCRV) nga mapugngan sa Department of Interior and Local Government (DILG) ang mga anaa sa ‘narco list’ sa ilang pagpapili sa 2019 midterm election karong Mayo 13 bisan pa og ma-publikar na unya ang ilang mga pangalan.
Gipaboran ni PPCRV Focal Person Henrietta De Villa ang pagdumili daan sa Commission on Election (COMELEC) sa pagbakwi sa kandidatura sa mga malakip diha sa narco list gawas lamang kung dunay disqualification case ug labaw nang may basehan ang petisyon, dinha pa makahimo og lakang ang poll body batok sa gikunsiderang mga ‘narco politicians.’
Maglisod usab ang poll body sa pagbawal sa mga kandidato nga makapapili sa umaabot sa eleksyon gumikan kay walay balaud sa piniliay nga awtomatikong magbasura sa kandidatura sa mga anaa sa narco list, dugang ni De Villa.
Dugang ni De Villa nga ‘unfair’ alang sa mga kandidato ang pag-anunsyo sa unod sa ‘narco list’ sanglit posibleng adunay mga inosente sa pasangil apan maguba na ang imahe pinaagi sa gitawag nga ‘trial by publicity.’
Gi-kwestiyon hinoon ni De Villa ang timing sa pag-publikar sa narco list sanglit pila na lamang ka bulan gikan karon mag-eleksyon na kita diin dili kalikayang makapangutana ang katawhan: Dili kaha kini tipik ug kabahin lamang sa political propaganda batok sa mga tawong madalahig sa maong kontrobersyal nga talaan?
RadyoMaN Joel Viray
