Davao City – Gihagit karon ni Akbayan Partylist Representative Tom Villarin ang gobyerno nga pasakaan og kasong administratibo ug kriminal ang bisan kinsang mga narco-politicians aron dili makadagan sa taliabot nga barangay ug Sangguniang Kabataan election karong Mayo 14.
Sumala ni Villarin nga kung dunay gihawirang ebidensiya ang kagamhanan, mas maayong pasang-atan og reklamo sa korte ang mga narco-politicians ug dili na i-anunsyo sa publiko ang ilang mga pangalan aron dili na sila makadagan sa piniliay kapin duha ka bulan na lang gikan karon.
Dugang sa magbabalaud nga walay katungod ang Philippine Drug Enforcement Agency nga did-an ang mga indibidwal nga buot mudagan ug magpapili sa Barangay ug Sangguniang Kabataan election karong tuiga.
Awhag pa niini nga pasakaan og kaso ang mga aspiring candidates nga nalambigit sa droga ug gipa-luyohan sa mga drug syndicate aron masanta ang ilang plano sa pagdagan karong Mayo.
Gisupak ni Villarin ang barug sa nasangpit nga ahensiya nga lutuson ang mga sakop sa Barangay Anti-Drug Abuse Council (BADAC) nga wala nag-aktibo sa kampanya kontra droga.
Imbes nga sang-atan og kaso sa korte, mas labing maayo nga taktakon sila ug hulipan niadtong adunay adbokasiya ug andam mutabang sa kagamhanan sa pagsumpo sa ilegal nga droga nga nanghitak sa kabarangayan.
RadyoMaN Joel Viray
