Narekober nga patay’ng lawas sa NPA leader gi-turn over sa iyang pamilya

Davao City- Gihatod sa kasundaluhan ang naugkat nga patay’ng lawas ni Ka Regoy kanhi Commanding Officer sa Guerilla Front 55, New People’s Army ngadto sa iyang pamilya aron mapahiluna na kini.

Kahinumduman niadtong Disyembre 6, 2021 narekober sa Scene of the Crime Operatives (SOCO), tropa sa 1003rd Infantry Brigade ug 3rd Infantry Battalion, ang patay’ng lawas ni Daniel Bandalan alias “Ka Regoy” sa kabukiran sa Sta. Felomina, Quezon, Bukidnon.

Sa interbyu sa DXDC RMN Davao kang Capt. Mark Anthony Tito tigpabama sa 10th Infantry Agila Division, sa dihang nadawat nila ang inpormasyon gikan sa mga kanhi rebeldeng nga sila alyas Piyot ug Emil kinsa maoy naglubong kang Ka Regoy giadtuan nila gamit ang bag-ong mga gi-deploy nga helicopters ang gilubngan sa kanhi high ranking official sa NPA ug ila kini gikalot.


“Kini man gud sa Ka Regoy kay gilubong ra siya didto sa bukid taga tuhod lang ang paglubong sa iyaha wala pod nahibal-i sa iyahang paryente kung asa siya gilubong. Niabot pa og December before pa siya na-discover o before pa siya gitudlo nga naa siya didto. Ang atoang ways forward ani is mahatagan siya’g disente nga lubong uban ang iyahang pamilya,” sumala ni Tito.

Sa testimonya sa mga kanhi rebelde, namatay si Ka Regoy tungod kay wala na maatiman ang sakit niini nga tuberculosis samtang natulog kini sa iyang duyan.

Gibasol ni kanhi top New People’s Army commander Ariane Jane Ocheta alias Ka Marikit ang uban pang mga lider sa CPP-NPA-NDF ug ilang internal nga bangi ang pagkamatay ni Ka Regoy kinsa wala tugoti nga mag-medical leave sa kabalakang madakpan kini sa tropa sa gobyerno.

Padayong nanawagan ang AFP sa mga nagpabilin pa sa kalihukan nga mo-surrender aron makauban usab nila ang ilang mga pamilya karong kapaskuhan.

RadyoMaN Aimee Guinita

Facebook Comments