Roxas City, Capiz- Narescue na ang OFW Capizeña nga si Maricel Barrera, 42-anyos halin sa poluy-an sang employeer sini sa *Al Farwaniyah*, *Al ‘Āşimah*, *Kuwait**.*
Ini ang pinaage sa bulig sang isa man ka Capizeño nga nagapatawag lamang sa ngalan nga “Roger” kag iban pa nga Pilipino nga nagatrabaho sa amo nga pungsod.
Suno diri, pinaage sa direkta nila nga komunikasyon sa messenger kag facebook, naplanohan sang mga ini kun paano ang himuon nga pagrescue.
Una nga ginpaprerar kay Maricel Barrera ang mga gamit sini nga sarang nga dal-on kag sa bulig sang taxi driver nga Pinoy nga nagatrabaho man didto, ini ang natigayon nga marescue.
Sa subong yara na sa embahada sang Pilipinas si Barrera kag sa sulod sang duha tubtob tatlo ka semana, ini na ang sarang nga makapauli sa Pilipinas matapos nga maproseso ang mga kinahanglanon nga papeles.
Sa madumdoman, personal nga nagdangop sa RMN-DYVR Roxas ang pamilya sang amo nga OFW agud nga magpangayo sang bulig para nga makapauli ini sa Pilipinas bangud sa kabudlay sang iya sitwasyon.
Ini ang ginapalimpyo sang iya amo sang kapin tatlo tanan ka balay lakip na ang poluy-an sang anak sang iya employeer. Wala man ini sang husto nga tulog kag pahuway kag kun kaisa noodles lamang ang ginakaon.
