Nasapwan sa probinsya sang Negros Occidental ang bangkay sang 10 anyos nga lalaki nga nalumos sa Hara-ao river sa Barangay Daga-ay, Tubungan, Iloilo sang nakaligad nga Setyembre 22, 2018.
Nakit-an sang mga residente sang Barangay Tabao, Zone 5 sa Valladolid, Negros Occidental ang bangkay sang bata nga si alyas Jake nga yara na sa advance state of decomposition.
Nakilala ini ang iya amay kag tiyo pinaagi sa ginasuksok sini nga T-shirt nga duag green kag may imprinta nga “Southcoast International School” .
Madumduman nga magkaupod ang bata kag lola sini nga si Rosalinda Tabal nga nagpanikop sang isda sa Hara-ao river sang maabtan sang baha kabangdanan nga ini sila ang gin-anud.
Una nga nasapwan ang bangkay sang lola samtang nadula naman ang bata.
Apang makaligad ang isa ka semana, nasapwan naman ang bangkay sang bata sa Valladolid, Negros Occidental.
