Iligan City- Pormal nga buksan karong adlawa, Lunes, Pebrero 19, ang pag- obserba sa kagamhanang lokal sa Iligan sa National Arts Month karong Pebrero.
Ipahigayon kini sa Rizal Park sugod alas-4:00 hangtud sa alas- 6:00 sa hapon pinaagi sa usa ka programa ug pagpahigayon og Tartanilya Painting Contest ug Parade of Mascot.
Apan alas-9:00 karong buntag, gipahibalo ni Konsehal Sol Bacsarpa, Committee Chair sa History, Arts and Culture sa konseho, ang pagpakita o pag-unveil sa Iligan City Landmark sa may Andres Bonifacio Avenue, Saray- Tibanga, ning siyudad, atbang sa may KFC Restaurant.
Kung kahinumduman nga bisan paman og karong adlawa pa ang pormal nga opening salvo sa National Arts Week, gisugdan ang mga kalihukan alayon sa maong kasaulogan niadto pa’ng Miyerkoles, Pebrero 14.
Usa ka broadway play kabahin sa kinabuhi ug trabaho sa bayaning si Juan Luna ang gipahigayon sa grupo’ng Philippine Stagers nga gi-uluhan og Obra Ni Juan.
Sugod usab niadtong, Biyernes, Pebrero 16 hangtud kagahapon, Pebrero 18, gipahigayon ang tulo ka mga workshop nga mao ang Theater Arts, Photography ug Dance Workshops.
Miingon si Bacsarpa nga sa pag-obserba sa National Arts Month, ipahigayon ang mga kalihukan nga naghatag og importansiya sa kultura ug kinabuhi natong mga Pilipino nga lahi kaysa sa ubang kultura sa ubang nasud sa kalibutan.
