Ginlunsar sang Department of Health (DOH) ang National Center for Mental Health (NCMH) hotline.
Suno kay Health Secretary Francisco Duque III, tinutuyo sini nga mahatagan sang counseling ang mga naga-eksperyensya sang krisis sa kabuhi kaangay sang depresyon, drug abuse, identity crisis, school kag career issue, kag iban pa.
Suno kay Duque, libre kag bukas sa tanan nga oras ang hotline nga 0917-899-8727 kag 989-8727 kon sa diin may mga eksperto nga magasabat sa kinahanglanon sang nagatawag.
Ginpasiguro ni Duque nga mangin confidential ang mga tawag.
Una na ginpahayag ni Duque nga may yara sang 3.5 milyon ka Pinoy ukon halos 4% sang populasyon ang naga-eksperyensya sang mental health issues.
Sa datos naman sang World Health Organization (WHO), may yara sang 800,000 ka tawo ang nagahikog kada tuig.
