Davao City – Ipahigayon sugod ugmang adlawa, Pebrero 27-28, ang National Technical and Vocational Education Training (TVET) Enrollment Day & Jobs Bridging alas 8: 00 sa buntag hangtud alas 5:00 sa hapon diin ipahigayon kini sa Davao City Recreation Center kun Almendras Gym.
Kaganiha sa Kapehan sa Dabaw, gitataw ni TESDA-XI information officer Mafel Gamale nga abli ang mga programa alang sa mga kwalipikadong indibidwal.
Giklaro ni Gamale nga prayoridad nila ang mga kaigsoonan natong overseas workers nga nag gikan sa nasud Kuwait. Gani, gi-set up na kaniadtong adlaw’ng Sabado ang TESDA assistance desk sa Francisco Bangoy International Airport diin gi-aprubahan kini sa Civil Aviation Authority of the Philippines (CAAP).
Sumala ni TESDA provincial director Eng. Nestor Tabada, usa kini ka simultaneous activity diin ipahigayon usab sa Gmall Digos sa Davao del Sur ug PESO Office sa Davao Occidental.
Sa record sa TESDA, mokabat sa 32,000 ka mga skilled graduates gikan sa tulo ka mga TESDA areas diin 66% niini ang nakatrabaho ug kasagaran anaa na abroad.
Dugang sa information officer sa TESDA-XI, P161.9M ang naaprubahang budget alang sa scholarship program sa TESDA.
RadyoMaN Jason Amisola
