National vaccination program sa Bukidnon sugdan sa dili madugay

Niabot na kagahapon ang pinaka-unang COVID-19 Vaccine sa rehiyon 10.

Sa interview sa RMN DXMB Malaybalay ngadto kang OIC – Assistant Regional Director Dr. David Mendoza, gibutyag niini nga ang unang batch naglangkob sa 17, 400 doses sa Sinovac vaccines nga niabot sa rehiyon.

Matud ni Dr. Mendoza nga ang mao nga ihap, muabot sa 8,700 ka indibidwal ka mga frontline healthcare workers sa mga tambalanan ang matupukan.


Nasayran nga mao mga bakuna, dad-on sa 15 ka mga tambalanan nga gi-ilang COVID-19 facilities sa Northern Mindanao kung asa apil niini ang Bukidnon Provincial Medical Center kon BPMC.

Samtang sugdan na sa dili madugay sa Pangagamhanang Probinsyal sa Bukidnon ang pagpatuman sa National Vaccination Program kontra COVID-19 virus, kung aha gitakda nang pagakuhaon sa personahe sa Provincial Health Office (PHO) ang sobra 500 doses sa unang hugna sa bakuna didto sa Department of Health (DOH) Regional Office.

Sigun ni provincial health officer Dr. Gary Guido C. Tabios, Jr. nga unang bakunahan ang healthcare workers sa COVID-19 Referral Hospital sa Bukidnon nga mao ang Bukidnon Provincial Medical Center (BPMC), nga posebling mahitabo karong umaabot Marso 7 o 8 ning tuig. Ang illegible population sa frontliners sa BPMC mopaubos sa mosunod nga proseso: 1. Registration – dinhi himoon ang pagsusi sa ilang identification; 2. Counselling – alang sa pagpasabot sa vaccination program; 3. Screening – aron mahibal-an kung wala baý gipamati nga dautan sa lawas pinaagi sa pag-check sa vital signs; 4. Actual vaccination; ug 5. Observation, diin obserbahan ang mabakunahan sulod sa 15 ngadto sa 30 minutos.

Alayon sa maong katuyuan nga pagbakuna sa 530 eligible population of frontliners, napahigayon usab ang Simulation Exercise diha sa BPMC, sa pagpanguna ni chief of Hospital Dr. Miguel Antonio Prantilla ubos sa pag-giya ni DOH – Bukidnon head Dr. Vincent C. Raguro, karong adlawa-Marso 4, 2021.

Gipasabot usab ni Dr. Tabios nga dili ipaubos sa vaccination program ang mga mabdos, nagplano nga magburos ug kadtong nag-edad ug 60 anyos pataas nga empleyado sa BPMC.

Mahinumduman nga gisugdan sa gobyerno ang paglansad sa National Vaccination Program niadtong Marso 1, 2021 sa unom (6) ka mga ospital sa Metro Manila, kung aha si Philippine General Hospital chief Dr. Gerardo Legaspi ang unang na-inoculate o nabakunahan. Gidasig karon sa gobyerno ang katawhan nga pahimuslan ang kahigayonan ug mosalig sa kagamhanan ning lakang sa pagpamakuna batok COVID-19 tungod kay miagi kini sa makuting pagtoon sa mga eksperto alang sa kaluwasan sa katawhan.

Sa data gikan ni Provincial Budget Officer Fe Retuertas, ang Pangagamhanang Probinsyal sa Bukidnon migahin ug ₱300-Million alang sa posebling pagpalit sa bakuna alang sa katawhan sa probinsya.

Facebook Comments