Davao City – Sayo gibalikan sa mga biktima sa sunog ang na-ugdaw nilang mga balay alas 8:00 kagabii sa Purok Sto. Nino Buhangin ning siyudad.
Gidaginot sa mga biktima ang mga sin, mga wires ug uban pa nga puwede nilang mabaligya pangpalit og bugas aron duna silay makaon karong buntag.
Naabtan sa News Team ang sakop sa pamilyang Carcallas nga nagkuykoy sa ilang puwede pa mapuslan gikan sa na-ugdaw nilang balay.
Ang pamilyang Carcallas nagbutyag nga kalit ang panghitabo mao nga lakip ilang mga silingan walay nadawdaw nga mga gamit bisan og sinina man lang.
Migula sa imbestigasyon sa Homicide and Arson section sa Buhangin PNP, nagsugod ang kalayo gikan sa boarding house ni Conchita Andrion.
Paspas mikanat ang kalayo sa kasigbit nga mga balay resulta sa pagka-abo sa lima ka panimay sanglit gama sa light materials.
Gibutyag sa Bureau Fire Protection Buhangin nga short circuit ang hinungdan sa pag-ulbo sa kalayo.
Samtang mokabat sa kapin 300-mil ka pesos ang kinatibuk-ang damyos sa sunog ug mao na kini ang ikaduhang sunog sa area sa Buhangin niining semanahona.
RadyoMaN Joel Viray
