Nawad-an og balay sa New Bataan tungod sa linog, tabangan

Davao City – Gipasalig sa Local Government Unit (LGU) sa New Bataan, Davao de Oro nga ilahang tabangan ang mga residente nga makapatukod sa ilang mga balay ilabi na kadtong giguba sa magnitude 5.9 nga linog niadtong Marso 7, 2023.

Sa interbyu sa DXDC RMN Davao kang Lynne Dollolasa, Municipal Disaster Risk Reduction and Management Office (MDRRMO) Officer, gisaysay niini nga maningkamot ang lokal nga gobyerno nga hinay-hinay nga makarekober ang mga biktima sa linog, ilabi na gyud kadtong apektado ang ilang pinuy-anan.

“Maningkamot ang Local Government Unit sa New Bataan nga mahatagan og ayuda (ang mga biktima sa linog) nga at least man lang matabangan sa pagpabangon og balik sa ilang mga panimalay,” sulti ni Dollolasa.

Samtang, nagpadayon gihapon ang relief distribution sama sa food packs alang niadtong profiled Internally Displaced Persons (IDPs).

Sa datos, adunay natala nga 372 ka partially ug totally damaged nga balay, diin ang mga pamilyang nagpuyo o apektado niini maoy benepisyaryo sa food packs ug pasiunang tabang gikan sa gobyerno.

RadyoMaN Kirby Manzon