Davao City-Gipailawom karon sa imbestigasyon sa International Affairs Division sa National Bureau of Investigation Central office si NBI XI Director Atty.Arnold Rosales tungod sa extortion nga gipahid kaniya.
Gikumpirma ni NBI XI Assistant Director Exzel Hernandez nga naglusad na og imbestigasyon ang ilang central office batok kang Director Rosales nga nagsugod sa adlaw’ng huwebes sa miaging semana.
Kahinumduman, si Rosales ug iyang ahente nangilkil og 500 mil ka pesos kang usa ka Leo Aquino bugti sa pag-atras sa Human Trafficking nga kaso nga gipasaka batok sa manager sa bar.
Suma ni Hernandez, samtang gilusad ang imbestigasyon nagpadayon sa trabaho si Rosales sanglit walay suspension order gipagula ang ilang central office batok sa Director.
Subling gilimod sa opisyal ang alegasyon nga nalambigit ang ilang buhatan sa extortion activity ug dili na kuno kini bag-o panahon adunay ingon niini nga isyu ibato kanila.
Gisulti pa ni Hernandez nga dili apektado ang moralidad ug sab mi-ubos ang ilang dungog isip tinugya-nan sa balaod karon nga gikusokuso sa alegasyon sa pagpangilkil ang ilang buhatan.
Gikumpirma pa sa Assistant Regional Director nga gawas sa kasong kriminal nga ilang gipasaka batok sa manager sa bar mupasaka pod usab sila og laing kaso batok sa mga midaot sa ilang buhatan.
Nahibaluan, gironda sa NBI XI ang bar sa dalang Torres ning syudad human nasuta nga dunay natigayon nga Human Trafficking subay sa reklamo sa usa ka babaye nga pugsanon nga gipatrabaho sa naasoy nga establisimiento.
Kasamang Joel Viray
