Davao City – Gipangulohan mismo ni Davao Archbishop Romulo Valles, D. ang misa sa may San Pedro Cathedral alang sa komemorasyon kun paghinumdom sa kamatayon sa mga nahimong biktima sa sunog sa NCCC Mall of Davao.
Ang aktibidad gitambongan sa mga kabanay sa biktima sa maong sunog, mga empleyado sa lokal nga panggamhanan, Davao City Mayor Sara Duterte-Carpio ug ni Davao City Vice Mayor Sebastian Duterte.
Sa iyang homily, gihulagway ni Valles ang kamatayon sa mga minatay sama sa ‘beautiful death’ ni Hesu Kristo diha sa krus.
“Though its painful, we say the Lord has taken them and assures us (of) life after death in His Kingdom,” matud sa arsobispo.
Gani human sa misa, dunay libreng paniudto gi-andam sa lokal nga panggamhanan alang sa kabanay sa mga biktima diin nakighinabi ug nagpaabot og pahasubo si Valles ingon man ang mayor ug bise-mayor.
Kahinumdoman nga December 23, 2017 nahitabo ang mangilngig nga insidente diin 38 ka mga tawo ang nakabsan sa kinabuhi.
Base sa pinakaulahing update nga natala sa City Mayor’s Office, adunay 18 ka mga tawo ang gipasakahan sa managlahing kaso nga parehong criminal ug administrative cases.
Sa maong ihap, tulo ang na-dismiss, unom ang pending, usa ang ipa-ilawom pa sa arraignment ug pre-trial conference ug laing usa ang gibalhin sa Deputy Ombudsman alang sa pagpasaka og criminal case.
Wala pa gihapon maka move on si Vane Kimpo sa kamatayon sa iyang anak nga si Vanesa Joy Kimpo bisan duha ka tuig na ang nakalabay gani nanghinaut gihapon kini og hustisya.
RadyoMaN Jason Amisola
