Davao City – Gidayeg karon sa National Disaster Risk Reduction Management Council (NDRRMC) ang Davao City gumikan sa pioneering spirit niini diha sa pagmontar sa usaka ‘comprehensive, elaborate and calibrated disaster management program or thrust.’
Sa pakighinabi kaniya sa morning primetime radio social commentary program nga RMN Straight to the Point, gipaambit ni Romina Marasigan, spokesperson sa NDRRMC ang iyang obserbasyon nga daghan ug mga talagsaong effort ang syudad sama sa kamugnaan sa grassroots-level response sa panahon sa kalamidad lakip na ang mga emergency protocols.
Usab gibutyag ni Marasigan nga kinahanglan anaa sa ‘personal level’ ang disaster management and execution haron kini maseguro nato nga kini magmalampuson.
Awareness kun igong kahibalo ug kahimatngon maoy labing mahinungdanon kun hisgotan ang pagpreparar nato sa atong tagsa-tagsa ka mga kaugalingon dinha sa pagsugat sa mga kalamidad man-made man kana o natural, matud ni Marasigan.
Segun sa disaster mitigation expert, panahon na usab karon nga seryosong tun-an kining katukoran kun formation sa usaka independiyenteng Cabinet-level national agency or department exclusively alang lamang sa pag-atubang sa kalamidad nga mamahimong pagatawgon nga usaka ‘Department of Disaster Management.’
Matud ni Marasigan, kritikal kini sanglit mas mahatagan man unya ug igong focus ingon man accountability ug responsibility ang calamity action ug responses ilabi na nga gikinahanglan nga adunay klarong direksyon dili lamang koordinasyon sa nagkadaiyang mga ahensiya o opisina sa gobyerno.
Ang NDRRMC niduso na niini nga sugyot ngadto sa atong balay-balauranan diin siya subli usab nga nanawagan sa mga tigpanday sa atong mga balaud nga tuki-on kini sa mas halawom nga pamaagi sanglit kinabuhi ang at stake ning maong hisgotanan.
RadyoMaN June Duterte
