NEDA-10 Director, mipresentar sa approved economic recovery plan sa Sangguniang Panlalawigan sa Bukidnon

Mipresentar si National Economic and Development Authority- Region-X (NEDA) Regional Director Mylah Faye Aurora B. Cariño sa Approved Economic Recovery Plan sa hawanan sa Sangguniang Panlalawigan.

Unang gipresentar ni Regional Director Cariño ang sitwasyon sa Northern Mindanao nga naglangkob sa Bukidnon, Camiguin, Lanao del Norte, Misamis Oriental ug Misamis Occidental sa wala pa ang COVID-19 ug ang nahimong epekto niini sa Gross Domestic Product panahon sa maong pandemya. Matud pa niini nga sa tuig 2018, nag-una sa paspas nga pagsaka sa ekonomiya ang Northern Mindanao nga moabot ngadto sa syete (7) porsyento ug adunay pinakadakong kontribusyon sa ekonomiya nga mokabat ngadto sa 44.1%.

Gawas niini, miubos usab ang Poverty Incidence Among Families gikan sa 32.3% sa tuig 2015 ngadto sa 17.3% sa tuig 2018. Samtang ang Poverty Incidence Among Families sa Bukidnon gikan sa 47.6% sa tuig 2015, minaug kini ngadto sa 22.3% sa tuig 2018.


Gumikan sa maong pandemya, gipresentar usab ni RD Cariño ang mamahimo nilang mga plano ug lakang aron makabalik ang ekonomiya sa Rehiyon-X pinaagi sa Northern Mindanao COVID-19 Regional Recovery Program (RRP) ubos sa New Normal. Ang COVID-19 Regional Recovery Framework naglangkob sa Economic, Social Services, Governance and Cross-Cutting Concerns ug Transportation.

Lakip sa Key Strategies Sa Economic Sector mao kining mga musunod; Ang pagsiguro ug hustong suplay sa luwas nga mga pagkaon, pagpalambo sa irigasyon, pagpahigayon sa digital transaction aron maminusan ang direct contact sa mga gimbuhaton, pagbalik sa mga negosyo ug pagpalambo sa entrepreneurial activities, pagpalambo sa mga kalihukan nga makamugna ug trabaho ug kaayuhan sa mga konsyumante, paghatag ug prayoridad sa mga OFW’s, Balik Probinsya, Bagong Pag-asa Program beneficiaries, ug sa ubang sector nga mahatagan ug scholarships/trainings.

Samtang sa Social Services mao kining mga musunod; Pagpalapad sa kapasidad sa public health facilities ug mga personahi, mapabilin ang physical distancing ug uban pang klase sa pag-amping, pagpakusog sa public health and nutrition education campaign ug uban pang pamaagi, masiguro nga igo ug matubag ang mga panginahanglanon, mapalambo ang alternative learning ug mapalapdan ang uban pang pasilidad sa edukasyon lakip na ang digital infrastructure.

Sa kinaiyahan o Environment mao ang maayong pagdumala sa mga basura ug malikayan ang zoonotic disease, maprotektahan ug makonserbar ang natural resources ilabi na ang kritikal nga mga dapit, masiguro ang water supply ug sanitation services, Ug mapalambo ang pagdumala sa mga hugaw ug masumpo ang pagkuyanap sa corona virus ug uban pang mga sakit.

Sa Key Strategies For Governance And Cross-Cutting Concerns mao kining musunod; Mahatagan ug gahum ang mga LGU’s sa mapakusgan ang kapasidad sa paghatud ug frontline services, makahimo sa tanang katawhan sa pagtubag sa pandemya pinaagi sa malambuong koordinasyon sa mga hintungdan, mapadali ang implementasyon sa mga programa sa ICT enable government, pagpalapad sa broadband infrastructure, palapdan ang research, development and innovation lakip na ang ICT, Pagsumpo sa mga kriminalidad, insurhensiya ug kagubot sa palibot, pagpalambo sa kapasidad sa Disaster Risk Reduction Management, ug paghatag ug luwas nga access sa kahimanan sa internet.

Samtang sa Transportasyon mao ang; Mapalambo ang sistema sa transportasyon aron masuportahan ang new normal, ug pagpromotar sa Non-Motorized Transport ug Personal Mobility Devices.

Facebook Comments