Davao City – Nabutang karon sa kontrobersiya si NEDA Undersecretary Rosemarie Edillon human gisulti niini nga makonsidera na nga dili kabus ang mga nagsweldo og diyes mil ka pesos matag bulan.
‘Anti-poor’ sumala pa ang gipasiatab ni Edillon gumikan ang kamatooran nagkamang sa grabe nga kalisod ang mga nagsweldo og diyes mil tungod sa kamahal sa palaliton ug kadaghan sa gastohanan.
Giingon ni Nagkakaisa Labor Organization Focal Person Mike Ybanez nga kuwang ang 10-mil ka pesos sa pamilya nga dunay lima ka miyembro busa imposible ang gisulti ni Edillon nga dili pobre ang nagsweldo sa mao nga kantidad.
Gipaboran ni Ybanez ang gipalanog ni Edillon nga haruhay tuod ang nagsweldo og diyes mil ka pesos ma-tag buwan apan kana nga kantidad haom pa niadtong tuig 1992 apan karon dili na.
Base sa pagtuon, sa kapin duha ka dekada nakalabay napulo ka hugna ang pagsaka sa presyo sa mga basic commodities wala pay labot ang pagmahal sa tuition fee, sa kuryente, tubig, ug daghan pang uban.
Segun ni Ybanez, aron ma-cope up ang gastohanan sa usa ka pamilya kansang dunay lima ka miyembro gikinahanglan magsweldo ang padre pamilya og usa ka libo matag adlaw kun 30-mil sa usa ka buwan.
Apan tungod sa existing nga regional wage system sa matag lugar dili gayod kaya hatagan og haruhay nga kinabuhi sa padre de pamilya ang iyang pamilya nga dakong sukwahi sa gipasiatab ni Edillon.
Nasuta sa pagtuon nga dunay lima ka importanteng prayoridad nga gastohanan sa tibuok buwan ang angay ikunsidera ug tan-awon sa matag pamilya.
Ang gastohanan matag buwan mao ang pagkaon, panimay, pamisti, panglawas, edukasyon diin sa napulo ka libo gawas nga kuwang wala nay matagana alang sa pagdeposito sa bangko.
Gani ang BSP 2014 consumer finance survey result, nagpakita nga 84% sa mga pamilyang Pilipino walay natipigan nga sapi sa bangko inay nalubong hinoon sa dakong utang.
Busa layo ug dili gayod mabati sa mga opisyales sa gobyerno ug sa mga adunahan ang kalisod sa mga mamumuo nga nagswedlo lang og diyes mil ka pesos matag buwan, dugang giingon ni Ybanez.
Padayon gipalanog sa Nagkakaisa Labor Coalition ang panawagan niini sa gobyerno nga papason na ang regional wage system ug patas-an ang sweldo aron maharuhay ang kahimtang sa mga mamumuo ug sa ilang tagsa-tagsa ka pamilya.
RadyoMaN Joel Viray
