Negosyante giilad sa Teacher , suspek sikop

GENERAL SANTOS CITY – Giangkon sa negusyanteng si Lalaine Ging Villaruel Suhanda, tag-iya sa Tierra Montana Hotel nga nakabase sa Gensan nga siya giilad sa usa ka maestra nga taga Pagalungan, Polomolok, South Cotabato.

Base sa pahayag sa negusyante, mukabat sa kinatibuk-ang P218, 400.00 ang natangag sa suspetsadong magtutudlo nga ginganlan ug Doris Dee Pamplona, nagtudlo sa usa ka tunghaan sa Polomolok.

Saysay ni Suhanda nga siya giilad sa suspek pinaagi sa social media account ni Bishop Jose Bagaforo nga nakabase sa Diocese of Kidapawan kung asa naghangyo matud pa nga kung mamahimo kining maka-donate ug Tabernacle, usa ka gamit sa simbahan nga butanganan ug Ostiyas.


Sa pagtuong si bishop Bagaforo ang nakig-transaksyon kaniya ug alang sa simbahan ang gipangayo, wala gyud kini magduha-duha nga magpadala ug kwarta ngadto sa bank account nga gihatag sa nagpailang Madre nga ginganlan ug Sister Doris Dee Pamplona.

Human nakapadala ug kwarta ang negusyante pinaagi sa online , laing mensahe ang nadawat sa biktima gikan sa suspek diin gamit gihapon ang social media account ni Bishop Bagaforo kung asa nihangyo na usab kini nga manghulam ug kwarta kantidad ug P150,000.00.

Ang kwarta gamiton matud pa sa pagpaospital kang Bishop Quevedo nga nakabase sa Cotabato City. Tungod niini nagduda na ang biktima mao nga derekta niining gitawagan si Bishop Bagaforo, ug didto iyang nasuta nga siya nailad human nga gikumperma sa Bishop nga na-hack ang iyang Social Media account.

Tungod niini nakig-alayon si Suhanda ngadto sa Cybercrime Group ingon man sa kapulisan aron nga madakpan ang suspetsado.

Malampuson usab nga na-locate ang nahimutangan sa magtutudlo kansa maoy ni-wihdraw matud pa sa salapi sa bangko sa Polomolok, mao nga kini gisikop.

Sa karon ang suspek balhog na sa silda sa Police Station 1 ug napasakaan na usab kini ug tukmang kaso.

Samtang gisuwayan usab sa RMN Gensan News Team nga kuhaan ug pahayag ang bahin sa Maestra apan nagdumili silang magpainterview, apan hugtanon nilang gihimakak ang kaso, sanglit gigamit ra usab matud pa ang pangalan sa magtutudlo sa pagpangilad.

Facebook Comments